Սուրիահայերու շնորհիւ` Հայաստանի մէջ արձանագրուած է 75 նոր գործարարութիւն

Ոսկերչութիւն, արծաթագործութիւն, սնունդի արդիւնաբերութիւն, վարսայարդարութիւն, կարի եւ կօշիկի արտադրութիւն, ինքնաշարժի նորոգութիւն, տպագրութիւն, տեսանկարահանում, օճառագործութիւն. ասոնք այն հիմնական ոլորտներ են, ուր սուրիահայերը ձեռնարկատիրական գործունէութիւն կը ծաւալեն:

«Ազդարար» լրատուականը իր անդրադարձին մէջ կը նշէ, որ 2012 թուականէն առ այսօր ՓՄՁ-ներու զարգացման ազգային կեդրոնը մօտ 500 սուրիահայ գործարարի տարբեր տեսակի օգնութիւն ցուցաբերած է, 106-ը ստացած են ֆինանսական աջակցութիւն` միջինը 4,5 միլիոն դրամի չափով եւ 5 տարի ժամկէտով: Արձանագրուած է 75 նոր գործարարութիւն, բացուած 112 աշխատատեղ:

«Այսօր սուրիահայերը աւելի զգօն դարձած են, գործ սկսելէն առաջ երկար կը մտածեն: Զգուշաւորութեան եւ խոր վերլուծութեան շնորհիւ վերջին շրջանին յաջողուած ձեռնարկատիրութեան թիւը սուրիահայերու մօտ 20 տոկոսով աւելցած է»,- կը նշէ ՓՄՁ զարգացման ազգային կեդրոնի գործադիր տնօրէն Գեղամ Պետրոսեան: